Lam 1 | NdeIBE | STEP | Kuthule kuthe zwi! Yeka lelidolobho elalinyakazela abantu! Selinjengomfelokazi, kanti lalilodumo phakathi kwezizwe. Lona elaliyindlovukazi phakathi kwezigodi manje seliyisigqili.

Lamentations 1

1 Kuthule kuthe zwi! Yeka lelidolobho elalinyakazela abantu! Selinjengomfelokazi, kanti lalilodumo phakathi kwezizwe. Lona elaliyindlovukazi phakathi kwezigodi manje seliyisigqili.

2 Linjengowesifazana okhala kabuhlungu ebusuku, izinyembezi zithe hlikilili ezihlathini. Kakho phakathi kwazo zonke izithandwa zakhe ongamduduza. Bonke abangane bakhe bamhlamukile; sebeyizitha zakhe.

3 UJuda useye ebugqilini ngemuva kokuhlupheka lokudonsa nzima. Usehlala phakathi kwabezizwe; akafumani ndawo yokuphumula. Bonke abamzingelayo bamxhumile ephakathi kokuhlupheka kwakhe.

4 Iyalila imigwaqo eya eZiyoni, ngokuba kasekho ozayo emikhosini yalo emisiweyo. Wonke amasango alo asekhohlakele, abaphristi balo bayabubula, amantombazana alo ayagomela, lona lidabukile kakhulu.

5 Izitha zalo sezingababusi balo; ziyaklamasa izitha zalo. UJehova ulehlisele usizi ngenxa yezono zalo ezinengi. Abantwabalo bathunjiwe, baba yizigqili zezitha.

6 Kuphelile konke ukubenyezela kweNdodakazi yaseZiyoni. Amakhosana ayo asenjengezimpala ezingafumani amadlelo; zibalekile zilambile zingelamandla zibalekela umzingeli.

7 Ngezinsuku zokuhlupheka lokuntula iJerusalema iyakhumbula wonke amagugu enotho eyayixhaphakele ngezinsuku zayo. Kuthe abantu bayo sebewela ezandleni zezitha, akubanga khona ongayinceda. Zayikhangela nje izitha zayo zahleka ukuchitheka kwayo.

8 IJerusalema yonile kakhulu ngalokho isingcolile. Bonke ababeyihlonipha sebeyidelela ngoba sebebonile ubuze bayo; yona ngokwayo iyabubula ize ifulathele.

9 Ukungcola kwayo kwabhixa izidwaba zayo; kayinakanga ikusasa yayo. Ukuwa kwayo kwesabeka, kungekho oyiduduzayo. “Jehova, ake ukhangele ukuhlupheka kwami, ngoba isitha sesinqobile.”

10 Isitha saphanga yonke inotho yayo; yabona izizwe ezingakholwayo zingena endlini yayo engcwele – bona labo owabanqabela ukungena phakathi kwebandla lakho.

11 Bonke abantu bayo bayagomela behamba bedinga ukudla; bathengisa inotho yabo eligugu ngokudla ukuze bangafi. “Jehova, ake ungihawukele ngoba sengidelelwa.”

12 “Kakusilutho kini yini lina lonke elidlula lapha? Ake likhangele nje libone. Kambe kukhona ukuhlupheka okulingana lokwami, khona lokhu engakwehliselwayo, nguJehova ngosuku lokuvutha kolaka lwakhe?

13 “Wehlisa umlilo uvela phezulu, wawehlisela phakathi kwamathambo ami. Wangithiya ezinyaweni ngomambule wangibuyisela emuva. Wangenza ngaba lesizungu ngaswela amandla ilanga lonke.

14 “Izono zami zisongiwe zaba lijogwe; ngezandla zakhe zelukiwe ndawonye. Zetheswe entanyeni yami kwathi uJehova wangiqeda amandla. Usengifuqele kulabo engingeke ngimelane labo.

15 “UJehova kabemukelanga bonke abangabebutho lami; usebize impi ukungihlasela ichoboze zonke izinsizwa zami. Esihluzweni sakhe sewayini uJehova unyathelele phansi iNdodakazi eMsulwa yakoJuda.

16 “Yikho ngilila amehlo ami empompoza izinyembezi. Kakho oseduze ongangiduduza, kakho ongavusa umphefumulo wami. Abantwabami sebeswela ngokuba isitha sinqobile.”

17 IZiyoni yelulile isandla sayo kodwa kakho oyiduduzayo. UJehova usekumisile ngoJakhobe ukuba abakhelene laye babe yizitha zakhe; iJerusalema isiphenduke yaba yinto engcolileyo kubo.

18 “UJehova ulungile, kodwa ngaphikisana lomlayo wakhe. Lalelani bantu lonke; khangelani ukuhawula kwami. Izinsizwa lezintombi zami bonke sebaya ekuthunjweni.

19 “Ngakhala kulabo engidlelana labo kodwa banginina. Abaphristi bami labadala bami babhubhela phakathi kwedolobho besadinga ukudla ukuze baziphilise.

20 “Ake ubone, O Jehova, ukuthi ngihlupheka njani! Ngiyatsha ngaphakathi kwami, ngidungekile enhliziyweni yami, ngokuba bengilihlongandlebe. Ngaphandle, inkemba iyadabukisa; ngaphakathi, yikufa kodwa.

21 “Abantu bakuzwile ukububula kwami, kodwa kakho ongangiduduza. Zonke izitha zami zikuzwile ukuhlupheka kwami; ziyathokoza ngalokhu okwenzileyo. Sengathi ungalufikisa lolusuku owalumisayo ukuze labo babe njengami.

22 “Abuvele kuwe bonke ububi babo; yenza kubo konke okwenzileyo kimi ngenxa yezono zami zonke. Kunengi ukububula kwami, lenhliziyo yami iphela amandla.”